Sit de coltura e attualità
 in lengua milanesa		 Invia i tuoi messaggi a:
info@elmilanes.com		 *




Ingredient per ses persònn:
Duu chili e mèzz de scigoll (ramaa) fettaa giò fin fin.
Desdòtt fettin de fontina ò de gruera.
On etto e mèzz de butter.
Duu liter de broeud de carna.
Desdòtt fètt de pan frances pòss.
Grana ò gruera grattaa.
Saa e pever.
Suppa de scigoll a la milanesa, del Renato Colombo


In d’ona terrina che la resista al foeugh fa palpà el butter e giontegh i scigoll. Con la fiamma bèlla bassa lassa coeus per circa on’orètta con su el coverc e, se occor, versegh denter on cazzuu de broeud bèll buient per minga fà taccà giò e scarbontì i scigoll.
Quand i scigoll a òpera finida, se sarann come deslenguaa, mettegh el broeud e fall sugà per on 45 minutt e poeu passa tusscòss al sedazz. Sora ògni fètta de pan frances mettegh ona fettina de fontina ò de gruera, metti ben in fila sora ona piastra e lassi in del forna al cald fina che el formagg el s’è deslenguaa.
In d’on’altra pignatta de terracòtta quattegh el fond con i fètt de pan gemò preparaa, bagni cont on ciccin de passaa de scigoll e broeud, fa ancamò on strat de pan cont el formagg, stravacca sora tutt el passaa de scigoll che l’era vanzaa.
Spantega in abbondanza el formagg grattaa (grana ò gruera come te preferisset ò tutti e duu) poeu fa gratinà in del forna a dusent gradi per circa 15 minutt, quand te vedet ch’el formagg el ciappa on bèll color doraa.
Tira via la pignatta dal forna e serviss la suppa in taola senza messedalla.
Come vin Rislingh del trentin, Marzemin.
Chesschì l’è on piatt fondamental de la cusina francesa, anca se la suppa de scigoll la se mangiava in Italia; a Milan e a Firenz prima de lor, infatti par che in Francia l’hann portada i coeugh de Caterina de Medici quand l’è andada a Paris per sposà Enrico II dòpo de chè l’è diventada soupe aux oignons te capii i frances ghe l’hann fregada ò almen inscì dis la stòria.
S’ciao a la prossima.