Sit de coltura e attualità
 in lengua milanesa		 Invia i tuoi messaggi a:
info@elmilanes.com		 *




Polpètt de Verza del Renato Colombo

 Tira via a la verza i foeuj pussee bei e pussee tener, tanti quanti polpètt te voeuret preparà.
Fà on taj in la crosta central de ògni foeuja in manera che la diventa pussee suttila, ma se la te par dura trala pur via senza riguard.
Fà ciappà el bui a ona pignatta d’acqua salada e pocciegh denter i foeuj de verza e lassi coeus per circa cinch minutt.
Poeu poggi sora on pian de marmor ò sul tavol de la cusina e lassi diventà frègg, in d’ona suppera mètt la carna, el salamm cruu (anca la bològna la pò andà ben), el pangrattaa, el formagg, l’erborinn triaa con l’aj, de sora s’ceppegh on oeuv (ò duu a bisogna) condiss con saa e pever poeu impasta ben tusscòss.
Poggia sora a ògni foeuja de verza ona ballottèlla de l’impast che t’hee preparaa, falla sù e lighela delicatament con del fil bianch, in d’ona cazziroeula fa palpà in del butter la scigollètta fettada giò fina fina con la panscètta (ò el grass de giambon) pòggegh denter i polpètt de verza e fai rosolà a fiamma bèlla viscosa, sbròffa cont el vin bianch che poeu te lassaree svaporaa, sbassa la fiamma e fa coeus per circa on’orètta.
Pòrta in tavola i polpètt bei cald, magari cont on ciccin de polenta, mì personalment cont i polpètt de verza preferizzi la polenta bianca, ma domandèmm minga el perchè, forse per on accostament de color.
Come vin mì ghe bevi on vin de l’oltra pò paves, Barbera, Bonarda, Sang de Giuda. Hinn bon tucc.