in lengua milanesa
info@elmilanes.com
|
|
|
Sit de coltura e attualità in lengua milanesa |
Invia i tuoi messaggi a: info@elmilanes.com |
|
|
LA COLOMBA PASQUAL
del Renato Colombo Voeuri sto mes dav la ricètta de la colomba de Pasqua e chì ghè de dì ona robètta a ghe n’è nò domà voeuna, ma i ricètt hinn tanti anca se hinn abbastanza simil tra de lor, gh’è chì mètt 7, chì 8 oeuv, chì ghe mètt domà el ross, chì duu etti de zuccher chì trii etti, chì trii etti de butter chì quatter, insòma per fala brev ve doo una ricètta d’on cert Meron ch’el faseva l’offellee in di anni cinquanta e gh’aveva el negòzzi in zòna sempion in doe stavi mì de cà a quèll temp. Prima de tutt mettii de part 100 g. de farina la vegnarà bòna in seguitt per spolverà. Mètt ona pignatta cont on liter e mèzz d’acqua in sul foeugh per intiepidila. Intanta in d’ona ciòcca con acqua tiepida deslengua el lievit, poeu impasta 100 g. de farina per ricavà ona pagnottèlla bèlla liscia e ben amalgamada aprèss bisògna infarinala e incid la superfis cont ona cros, quindi la và immèrsa in l’acqua tiepida e lassala denter per on 10 minutt fin quand la ven a galla la và girada pussee d’ona vòlta e missa a riposà per qualche minutt. A part sora ona spianada mètt la farina a crater, denter ghe vann i oeuv, la scòrza de limon, on zicch de saa, 250 g. de butter, el zuccher, el latt inpiepidii e el panètt lievitaa, lavorà con cura per impastà tusscòss, quand l’è bèlla laorada a fòrma de panètt gh’avii de quattala giò cont on strasc per fala lievità. Appèna el volum l’è aumemtaa d’on bèll poo gh’avii de riprend l’impast e inglobà denter 75g. de butter, infarinà ancamò quattà cont el strasc e lassà riposà per circa dò or, riprend anmò l’impast mètt i alter 75 g. de butter laorà con cura e giontagh la frutta candida tajada a dadin, impastà e mètt el tutt in d’on stamp, sporcaa de butter, a fòrma de colomba, quattà cont el strasc e lassà lievità ancamò. Prima de passà el stamp in del forna spennellà de sora el ross d’on oeuv montaa, distribuì el zuccher in granèlla i mandorl e infin mètt el tutt nel forna (gemò cald a 180-200°) Dòpo on des minutt sbassà la temperadura, quattà la colomba con carta oleada e seguità la cottura per circa 30 minutt. La carta la serviss per minga fà indorà tròpp la colomba. La và servida naturalment frègia cont on bon vinèll mì se ghe bevi dree? V’el disi subit: Asti spumant.. Moscaa natural.. Prosècch de Coneglian..Vin Santo Ma se voeuri on quaicòss de special: Sauternes..Muffato della Sala..Verduzzo.. Chateau La Brie Monbazillac..
|
