Sit de coltura e attualità
 in lengua milanesa		 Invia i tuoi messaggi a:
info@elmilanes.com
Stèma




























 VIGNAA e la soa stòria del Giovanni Costanzo

Vignaa, se troeuva a circa 15 km. a est de Milan situada a 118 m. sora el livèll del mar l’estension del territòri comunal l’è de 8,64 kmq..
El sò territòri, quasi tutt inserii in del Parch Agricol Sud de Milan l’è caratterizzaa da la presenza de fontanil, fòss e cassin cont on paesagg tipich de la media pianura alluvional.
Trè strad provincial attraversen el comun, la Cassanesa, la Rivoltana e la Vignaa-Paull. Vignaa l’è attraversaa da la ferrovia Milan-Venezia.

La stòria
L’origin romana de Vignaa l’è minga certa, ma par pròppi che sia inscì, el sò nòmm l’è facilment d’intend come on paes ligaa a la coltivazion de la vit e, quindi a la presenza de tanti vign, in di temp antich risorsa abbondanta de la zòna.
El nòmm de Vignaa se ved per la prima vòta in del 776, sora on att legal, nel qual troeuvom el nòmm d’on cert GUIFREDUS DE VINEATE.
Alter document accerten ch’el Monaster Benedettin de Civaa l’era propietari di terren a Vignaa e dintorna, almen fin a l’inizzi del XIII secol quand, anca alter Enti Monastegh, quasi tucc milanes gh’hann comperaa territòri in zòna.
Tra questi i ges de Santa Tecla, de Santa Maria Beltrade e de San Steven in Bròlo.
Del rèst in epoca medieval se sà che i tecnich agricol d’irrigazion pussee a l’avanguardia hann semper faa capp ai ordin monastich e on territòri rural inscì bon e produttiv el podeva minga che attirà i attenzion de la gesa.
La fertilità del territòri e de conseguenza, la produzion agricola, aumentaren tantissim con l’apertura del Navili de la Martesana (1460) sòtta i Sfòrza.
Cont i guèrr tra frances e spagnoeu per el possèss del Milanes e la vittòria de Carlo V, anca i vicendi stòrich ligaa a Vignaa hinn staa caratterizzaa da la dominazion straniera che le s’è avuda fin a l’Unità d’Italia.
Vignaa, che l’apparteneva al fèud de Melz e Gorgonzoeula, quand la familia feudataria di Trivulzio la s’è estinta (1678) el s’è liberaa dal gioeugh feudatal (23 april 1691) , ma l’ha dovuu pagà 48 frach imperial per familia, ò fogolar come se diseva allora, al governo spagnoeu.
A ricordà l’evento, dal 1996, la prima domènega dòpo Pasqua (in Albis) el paes celebra la Fèsta de la Redenzion.
Il governo spagnoeu ch’el gh’aveva la cassa semper voeuia, per via di guèrr che allora gh’eren tutt i dì, la deciduu de vend l’inter fèud e l’ha miss a l’asta, la comunità de Vignaa l’è riessida a pagà l’intera somma (ben 4.074 franch imperial) che gh’ann consenti d’ottegnì l’indipendenza.
A seguit di riformi miss in pratica dai tognitt, Cassina Bianca, Gud, Retenaa e Vignaa hinn staa raggruppaa in on unich comun, poeu in del 1869 gh’è staa tacca anca San Pedrin.
Vignaa in del 1861 el contava 1.254 abitant, quasi tucc bosin per duu terzi analfabètta.
L’attività agricol principal l’era la coltivazion del forment, poeu gh’era la produzion del formagg grazie ai tanti allevament de vacch.
Dòpo la seconda guèrra mondial, cont el boom economich di anni cinquanta, gh’è staa ona gran evoluzion de industria e artigianaa, soratutt l’edilizia la gh’ha avuu on svilupp fondamental in del svilupp urban, tant de cambià radicalment l’assètt del territòri.

Cittadin illuster e òper artistich
Tra quei che hann contribuii a la causa e la fama de la comunità de Vignaa ricòrdom:
Arderico da Vignate, vescov de Lòdi (1105-1127); Antonio da Retinate, stòrich e cronista del XIII secol; Antonio Ratti e Stefano Baruffi tra i mila de Garibaldi; Mons. Biraghi stòrich e fondador de la Congregazion di Suor de San Marcellina, per quèst l’è avviaa el procèss de beatificazion; don Giusèpp Gervasini, mej conossuu come el Pret de Ratanà, probabilment el nòmm Ratanà el ven da Retenaa la frazion de Vignaa doe el don Gervasini l’è staa per circa quatt’ann a inizzi secol.
Ona visita la merita la gesa dedicada a Sant Ambroeus e de cui gh’èmm notizzi fin dal XII secol, a l’intèrno on crocefiss ligneo del primm Cinchcent, ona tela a òli d’inizzi Sescent con dipingiuu San Carlo Borromeo e quattòrdes quader del sèttcent de scòla lombarda che illustren la Via Crucis.

Vignaa incoeu ann 2004
I famili resident hinn circa trèmila per 8.000 abitant scarsa la percentual de stranier men del 2%.
Domà el 12% de la popolazion l’è rappresentaa da persònn òltre i 65 ann in contra tendenza con la media nazional. Incoeu l’agricoltura la rappresenta pù ona font de guadagn e de laorà come in passaa de conseguenza s’è diffus el pendolarismo vers Milan.
Ma 500 aziendi hinn present sul territòri circa la metà operen in di servizzi, alter in attività manifatturier che laoren plastica e metai. Logistica e traspòrt rappresenten i attività noeuv e hann portaa capitai e investiment dal rest d’Italia. Ona quindesèna de aziend agricol alleven i bovin e hinn i ultim risòrs del settot primari.
EL TERRITÒRI