in lengua milanesa
info@elmilanes.com
|
|
|
Sit de coltura e attualità in lengua milanesa |
Invia i tuoi messaggi a: info@elmilanes.com |
|
Stèma        |
PESCHIERA
BORROMEO e la sò stòria Peschiera Borromeo, la se troeuva a 101 m.s.m. a 11 km. a S.E. de Milan e se estend sora ona superfice de 23.45 kmq. Dal 6 agost 1988 l’è stada riconossuda città dal President de la Repubblica. El sò stèmma, concèss nel 1964, raffigura on scud con la coròna comunal a rappresentà la sovranità cittadina; duu ramm tegnen sù el scud: a sinistra on ramm de laor in memòria de la glòria passada a destra on ramm de quèrcia. Sora el scud campeggia el motto “Humilitas”, che l’appartegniva a la familia Borromeo. El fiumm Lamber e i fontanii hinn rappresentaa da ona fassa bloeu che la percorr in diagonal el scud. Infinn spazzi a la mitologia: defatt in la part inferior del scud gh’è rappresentaa on basilisch, animal leggendari d’ispirazion medioval, che la tradizion popolar el voeur come antich abitant d’on vègg stagn paludos in la zòna de Peschiera. La stòria Cont ògni probalità Peschiera l’è stada fondada dai Roman. Hinn staa lor defatt che hann costruii la vèggia strada Paullesa che la portava da Milan a Crèma. Ciò l’ha renduu stà strada de fondamental importanza per i commerci e per l’istituzion de locand per el ristòri di viandant, che hann contribuii al svilupp e a la prosperità de la zòna. I numeros frazion, che componen el territòri, deven pròppi a l’epoca romana la soa costituzion e naturalment l’onomastica: Canz da la familia Cantius l’è vun di villagg pussee antich, insèma a Bettola doe s’hinn formaa i primm bettol; Linate deriva da Linatum per i coltivazion del lino; Mezzaa significa camp de mèzz, probabilment l’indicava ona zòna de separazion de dò proprietà; El nòmm Zel Foramagn deriva da agellum, camp piscinin. Nel VI secol i Longobard gh’hann invas la Lombardia, la soa società l’era divisa in tribù ciamaa “Fare” on pòst important a l’interno de la tribù l’era occupaa da i “Arimanni” i guerrier. I Longobard s’hinn piazzaa in la bassa padana principalment longh el Lamber e in di prèss di strad principai (la paullesa e la via Emilia). Ecco come s’è costituii, per esempi, Foramagn, nel cui nòmm l’è nò difficil individuà l’origin barbarica. I Longobard hinn poeu staa sconfitt da i Franch per opera de Carlo Magn; de quèst’epoca la fondazion de la Gesa de San Martinn a Zelo che purtròpp incoeu la consèrva domà i fondamenta de allora, dal moment che l’attual gesa la risal al XVII secol. El Castèll Borromeo Nel XIII secol, i Viscont diventen Signor de Milan e controllen bòna part del territòri a sud de Milan. Tra i vari òper realizzaa con numeros ges e istituzion benefich, come ad esempi l’ospedal Noeuv. Vitalian Borromeo nel XV secol l’era diventaa consiglier de Filipp Maria Viscont che, nel 1432, l’ha autorizzaa a edificà on castèll, pussee esattament a fortificà quèlla che l’era stada la cassina “di fraa negher”. El pussee famos occupant del castèll l’è staa senz’alter el futur sant Carlo Borromeo che da bon peschieres e possident el curava personalment i frutt de la tèrra. L’agricoltura e i piev La particolar disposizion e la conformazion del territòri, hann consentii a Peschiera de sviluppà, fin da l’antichità, on’attività rurall particolarment feconda. Defatt, la zòna l’è ricca di fontanil, sorgent naturai con l’acqua che la ven direttament da i montagn, prima de vegnì foeura dal terren. I bonifich (ricordèmm la Peschiera) e l’abilità del clero in la canalizzazion hann faa in manera che Peschiera la diventass vun di pussee organizzaa centro agricol de la Pianura Padana. La maggior part di territòri de la Bassa Padana a partì da l’età Franca eren staa suddivis in Piev, sòtta el lor dirètt contròll amministrativ, come gh’èmm vist sòra tutt ligaa a l’agricoltura del clero; a ògni piev corrispondeva, de conseguenza, ona basilica. La situazion, per inscì dì, geopolitica, l’è restada invariada per tanti secol. I grand òper L’è staa nel 1928 che Mussolini l’ha decis de trasformà ona cava de sabbia e de gèra in on lagh artificial. L’è nassuu inscì l’Idroscalo, costruii con l’intenzion de fann ona zona per l’atterragg di idrovolant. Duu ann pussee tardi l’òpera la vegniva inaugurada, ma gemò l’era tardi l’era di idrovolant l’aveva finii la soa brev stòria. L’è staa inscì che se pensaa a la costruzion d’on ver aeropòrt per soddisfà el traffich puttòst intens d’ona metropoli come Milan, che de lì a pòcch se prevedeva. Visin a l’idroscalo, trasformaa, a tuut’ora, el lagh de Milan, l’è stada costruida la prima part dedicada a l’avier Enrico Forlanini, quèll che incoeu l’è pussee conossuu come l’aeropòrt de Milan Linaa (1937). I òper realizzaa gh’hann avuu on’emorme conseguenza in l’assètt territorial de Peschiera, la paulles l’è stada divisa inscì in duu, come el comun che inoltra l’ha dovuu ced ona consistenta area territorial a Milan. Incoeu Dòpo i rivolozion urbanistich e territoriai d’epoca fascista, Peschiera, l’ha conossuu on gran svilupp, ligaa a l’industrializzazion, in di ann del boom econòmich. Minga pù domà l’agricoltura, a caratterizzà la vita econòmica di Peschieres. In stì ultim vint’ann l’urbanistica de la zòna l’ha subii notevol trasformazion, con centinaia de famili che per scappà da l’incub metropolitan, che gemò caraterizzava la vita laorativa, hann decis de trasferiss in on contest pussee vivibil, soratutt per i fioeu. On gran svilupp, de conseguenza, che l’ha caraterizzaa el settor di servizzi. Tra i alter, Peschiera, vanta vun di primm Uffizzi per el rappòrt cont el pubblich.
|
