al cent per cent in lengua milanesa
info@elmilanes.com
|
|
|
Sit de coltura e attualità al cent per cent in lengua milanesa |
Invia i tuoi messaggi a: info@elmilanes.com |
|
Stèma      |
MAGENTA e la soa stòria Articol del 2004 del Giovanni Costanzo El territori Magenta l’è situada a 128 m. sora el livèll del mar a la sinistra del Tesin, la se troeuva a circa 25 km. a Ovest de Milan e la se estend su ona superfice de 21.79 kmq. I primm insediament L’origin probabilment la risal al V secol A.C. per man di Galli Insubri che s’hinn insediaa in sto territori strategich prèss el Tesin. I roman hinn rivaa a Magenta in del 222 A.C. vist che l’era l’ultima località abitada prima del fiumm su la via consolar ad Vercellas in direzion del Piemont. L’origin del nòmm In età imperial soratutt la serviva da confin tant che Massenzio l’ha faa costruì on presidi militar in doe gh’era gemò on paesòtt che, probabilment dal nòmm de l’imperador l’ha ciappaa quèll de castrum Maxentiae. Second on’altra versione l toponim el podaria derivà dal vocabol mansio (dal man_re stà, restà) che l’indica ona pizza de sòsta, l’ultima in sto cas, prima de l’attraversament del fiumm, ona specie de stazion de servizzi de l’epoca. La stòria A seguit di invasion barbarich , el pòst l’ha dovuu fà i cont con l’inutilizzi di vii de comunicazion sia dal punt de vista militar che da quèll commercial, che in passaa rendeven la zòna assee florida. A livèll religios Magenta la faa capp in sto period a la curtis de Corbètta. A l’inizzi del second millenni la stòria de Magenta l’è ligada a quèlla milanesa e l’ha risentii in particolar manera de la guèrra contra el Barbarossa calaa cont el so esercit in la pianura padana tant che l’è stada completament saccheggiada e rasa al soeul. In del 1310 on’ospite de riguard l’imperador Arrigo VII (el medesim in cui Dante l’aveva ripòst tanti e bei quant infondaa speranz) el s’è fermaa Magenta, ma sorpres da ona fortissima nevicada per riconoscenza l’ha innalzaa el villagg a la dignità de borgh, con l’istituzion d’on presidi armaa permanent e d’on mercaa commercial che, a partì dal 1410 s’è tegnuu tutt i giovedì. A la fin del tresent Gian Galeazz Visconti l’ha faa regal de grand territori a la Certosa de Pavia, i cui fraa hann poeu insegnaa a la popolazion la coltivazion intensiva di campagn in la zòna del Navili Grand ch’el va in vers al Tesin irrigada con l’acqua di fontanii. Dal domini di Viscont Magenta l’è poeu passada sòtta quèll di Sfòrza e quindi sòtta al rè de Spagna che l’ha poeu conceduda in feod al cont Luis Melzi nel 1691. Pòcch ann dòpo el borgh l’ha dovuu fà i cont con l’ondada de pèst de manzoniana memoria. A l’inizzi del sèttcent Magenta l’è passada sotta i Asburgo; la cà d’Austria, a part el brev intervall repubblican istituii da la campagna napoleonica, l’ha mantegnuu el contròll fin al 1859, quand i insurrezion e i guèrr d’indipendenza staven per portà a l’unità d’Italia. El sèttcent I magentin nel cors del secol hinn costrètt a sottastà ai privilegi che i nòbil famili milanes goden nel territòri, soratutt in occasion di vendèmmi e di raccòlt. Nel 43 Magenta almen da on pont de vista religios l’ha conquistaa la pròppia indipendenza, defatt cont ona bolla papal, la parròcchia de San Martin l’era stada erètta in collegiata e l’ha poduu quindi staccass da la dipendenza de Corbètta. Quand l’esercit napoleònich, nel 1796 l’è andaa denter, Magenta la contava circa 3.500 anim la popolazion, inutilment l’ha cercaa de fala diventà caploeugh del distrètt, ma sto privileg el ghe staa rifiudaa, per quèst i magentin cominciaren a mal sopportà la presenza di frances che tra l’alter gh’aveven on comportament per nient divèrs da quèll di dominazion precedent. El vòttcent Poeu quand a Magenta, hinn rientraa i Austriaci, de Napoleon la gent la sentii minga de cert la mancanza, sebben che l’aveva cominciaa la costruzion d’on pont sora el Tesin che l’ha contribuii a cambià el territori con di noeuv strad e la nascita de la frazion Pontnoeuv. Cominciaren a vegnì su fabbrich i piccol industri, soratutt nel settor tessil e caseari, in sto period i Austriaci hann faa inserì Magenta in la provincia de Pavia e de quèst la popolazion l’era per nient contenta. Magenta l’è famosissima in la stòria risorgimental per la battaglia del 4 giugn 1859 i austriaci hinn staa battuu da i Franchi-Piemontes che eren a difesa del borgh che, cont el pròppi valor, hann spianaa la strada de l’esercit indipendista vers Milan e vers la costituzion de l’unità d’Italia. Vers la fin del secol l’è entraa in funzion, grazie ai generos concittadin Gioann Giacobbe e Giusèpp Fornaroli, l’ospedaa civich. El noeuvcent Magenta la pò vantà el titol de città dal 1947, per decrètt del President de la Repubblica Enrico De Nicola e anca per el tributt versaa da Magenta contra la lòtta al nazifascismo. Bottegh i industri aveven cominciaa a vegnì su in gran numer gemò a la fin del secol scors e, Magenta la se troeuva ad avè olter a impiant tessil e meccanich, anca particolar attività come quèlla de la produzion de fiammifer e sofranei e da la costruzion de òrghen.
|
     |
