Sit de coltura e attualità in lengua milanesa

Invia i tuoi messaggi a: info@elmilanes.com

---

Stèma

LEGNAN e la soa stòria del Giovanni Costanzo Legnan el se estend sora 17.72 kmq de superfice, su el fiumm Olona, a 199 m.s.l.m., 27 km a Nòrd-Ovest de Milan, in pratica al confin con la provincia de Vares. El nòmm Divers hinn i ipotesi su i origin del nòmm de la città, numm ne segnalom quaivoeuna. Fòrse el deriva dal Consol Lucio Licinio Crasso, a cui se dev la denominazion de Licinium che, quaivon l’identifica con Legnan, per quaivon d’alter la città l’è on Vicus agri Sepriensis, ossia on villagg del Seprio. In antich cart geografich troeuvom tanti variant tra cui Liniano, Livian, Legniano e in dialètt Legnan ò Legnarèll, derivaa da Legnanèll. Second el dizionari toponomastich de l’Olivieri, prima de l’Ann Mila Legnan l’era ciamada Lemnianum, che poeu l’è diventaa Legnanum. Cenni stòrich I reperti pussee antich su el territori legnanes hinn di tocchètt d’on vas a forma de campana rinvegnuu in di ann vint e risalent a la coltura de Remedèll (fin 2000-1800 a.c.) Important hinn anca di corred in bronz e oggètt roman rinvegnuu in ona necropoli, piatt, copp, biccer, spègg, arnes de fèrr e moned. On att de cession d’ona cort del 789 el costituiss la prima certa traccia storica, el document l’indica direttament el topònim. Legnan l’è staa probabilment testimòni de lòtt religios fomentaa da S. Arialdo con la soa predicazion contra l’arcivescov Guido da Velaa. La battalia de Legnan L’imperador Federico de Svevia, soranominaa Barbarossa, el voreva sottomètt i città italian, ma l’ha trovaa l’opposizion de Milan. Dòpo ch’el s’è alleaa cont i todèsch el moeuv su Legnan. I Comun lombard bandònen ògni rivalità e se metten insèma, el 29 de magg 1176, a Legnan gh’è la battalia. On’avanguardia de legnanes l’è dree sottomètt el nemis quand el riva el Barbarossa con l’esercit al complètt, i lombard s’attesten intorna al Carròcc, i difensor del Carròcc hinn adree a soccomb quand da Milan tutti i esercit comunai, riunii in la Lega Lombarda, intervegnen e sbaraglien l’esercit imperial, el Barbarossa riconoss i diritti e i privilegi di Comun. Dal medioevo al cinqcent A Ottone Visconti l’è fada risalì la costruzion de la maggior part del Castèll che, circa in del 1437, l’è staa regalaa da Filippo Maria Visconti a Oldrado Lampugnani, che l’ha faa restaurà dòpo on sacchegg subii a opera de Fancèsch Sforza, el castèll l’è de proprietà del Comun da la seconda guèrra mondial. Important el fatt che Legnan l’è pièna de ges gemò in del 1300, come quèlla de S. Ambroeus, S. Martin, S. Salvatore, S. Maria, S. Agnes e S. Nazaro, cont i ges s’instaura l’industria de la lana e stà tradizion la fà del Legnanes e del Varesòtt, ancamò al dì d’incoeu, on riferiment per tutta l’industria tessil in Italia. Tutt i ges, appartegniven a la piev de Olgiaa Olòna, trasferida poeu a Bust Arsizzi, fin a quand Legnan per l’importanza econòmica acquisida l’è diventada cappiev in del 1584. L’epoca di Viscont e di Sfòrza l’è stada on’età de svilupp econòmich principalment basaa sora l’agricoltura e l’attività commercial. Gran legnanes l’è staa el religios Gioann Oldrendi, nodar, scrittor de numeros liber, Vicari del Papa, professor a la prestigiosa università de Bològna, in doe l’è staa anca Podestà e doe l’è mòrt in del 1383. La dominazion austriaca Sòtta la dominazion austriaca l’è staa riordinaa el catast e i ben de Legnan hinn staa suddivis in proprietà de prima stazion, relativ ai terren e de seconda stazion relativ ai cà, Legnan l’è staa divis in noeuv comun pussee piscinin con amministrazion autonoma. El vòttcent Con l’inizzi del vòttcent l’è cominciaa ona trasformazion gradual. Sèmm che in del 1807 a Legnan gh’eren di filand per la laorazion de la seda e del coton a livèll artigianal che poeu s’hinn industrializzaa cont el svizzer C. Martin, ai sò dipendenz gh’eren 200 operari nel 1863, poeu hinn nassuu i filand Krumm e Borgomaneri, i stabiliment Dell’Acqua (1879), Bernocchi (1872), De Angeli (1875) e el cotonofizzi Cantoni (1879) pròppi da lì veniva el F. Tosi, fondador de l’omònima officica nel 1882. Hinn nassuu in quèll period anca divers finanziari come la Banca de Legnan (1887) e el Credit Legnanes (1923) El noeuvcent Cont el svilupp industrial s’hinn verificaa on aument de la popolazion e la conseguenta trasformazion edilizzia, a l’inizzi del noeuvcent l’è staa costruii el noeuv Ospedal e la noeuva sed municipal. Con la fin de la seconda guèrra mondial la produzion la ricominciaa a còrr. L’artigianaa l’ha faa da suppòrt ai maggior aziendi e s’è sviluppaa anca el settor terziari. Intorna ai ann sessanta Legnan l’ha cambiaa radicalment l’urbanistica, con la copertura d’on tòcch de l’Olòna, la creazion del vial Toselli, la soppression del tramm e la costruzion d’on grattaciel, numeros i associazion nassuu, come la Familia Legnanes, la Società Art e Stòria el museo Sutermeister.