Sit de coltura e attualità
 in lengua milanesa		 Invia i tuoi messaggi a:
info@elmilanes.com
















































el comitaa Italian per el Contròll
di Affermasion sul Paranormal

El Cicap l’è on’organișșasion educativa e sensa fin de guadagn, fondada in del 1989 per promoeuv on’indàgin scientìfica e crìtica in sul paranormal.
El fa part de l’European Council of Skeptical Organisations.

El ne pò spiegà a la curta de còssa l’è che se òccupa el Cicap?
El Comitaa Italian per el Contròll di Affermazion sul Paranormal (Cicap) l’è on’organișșazion scientìfica e pedagògica, sensa fin de guadagn, che la promoeuv on'indàgin scientìfica e crìtica vèrs el paranormal.
El Cicap l’è nassuu in del 1989 per on inisiativa del Piero Angela e el pòrta innans la soa òpera de divulgasion e promosion con di conferens pùbblich, di intervent radiotelevisiv, di pubblicasion del periòdich Sciensa & Paranormale e di pubblicasion de lìber e artìcol su chi argoment chì.
El se òccupa, in sostansa, de indàgin su tutti i fenòmen “misterios” e divulgasion di sò risultaa.

Chi l’è che hinn i sòci (intenduu come figur professionai)?
I sòci effettiv hinn 13, e intrà quèsti chì, el president Steno Ferluga (Astrofìsich, de l’Università de Trieste), el segretari nasional el Massimo Polidoro (Psicòlogh) e el Luigi Garlaschelli (Chìmich, de l’Università de Pavia).
In general l’è nò assolutament necessaria ona làurea per aderì ai inisiativ del Cicap, ma ognidun cont on poo de spìrit crìtich e de inisiativa el pò collaborà sensa problèma e cont on gròss in su Cicap.
Pròppi per chel motiv chì el Cicap l’organișșa tutti i ann on “Cors de indàgin scientìfica del paranormal suppòst”. L’obiettiv l’è quèll de fornì ona “formasion” basilar a tutti quèi che desìderen condù di indàgin scientìfich in sul paranormal, per cunt sò ò in collaborasion cont el Cicap, ma anca a tutti quèi che semplicement voeuren savènn pussee e approfondì in del moeud pussee articolaa di argoment de interèss particolar.

I vìttim di “maghi”, di strii, di cartomant e di burlettee vari, pòden rivòlges a viálter? Se pòden fall, ‘me l’è che intervegnii?
Sì, ognidun el pò rivòlges al Cicap, ma el Cicap l’intervegn domà se l’è ciamaa a fà on contròll del supponuu poter paranormal del “mago”. In chèll caso chì, se el “mago” l’è d’accòrd, l’è possìbil cordass per on speriment controllaa in moeud de verificà i sò affermasion. Fin a adèss nissun l’ha passaa sto contròll. El Cicap el va nò denter in del mérit de di problemàtegh relativ al plagio, gh’è di alter struttur adattaa a quèll.

Quai l’è che hinn staa i cas pussee eclatant che ve sii occupaa?
In del camp di truff, podarissi regordà quèlla di guaridor filippitt che recentement l’è tornada in scènna.
El Marco Morocutti del Cicap l'ha mostraa a “Striscia la notisia” come l’è possìbil, purtròpp, bolgirà facilment di persònn che se troeuven in d'ona situasion de salud verament diffìsil. Gh’è n’è tantìssim alter.

Che dagn psicològich e econòmich ghe càusen ai sò vìttim quèi che se fann ciamà “maghi”?
Purtròpp i dagn hinn notàbil. I persònn che se rivòlgen ai “maghi” hinn pròppi quèi che del pont de vista psicològich gh’hann giamò in partenza di problèma gròss.
Quand vann in del “mago” fann minga alter che aggravà la soa situasion e dessorapù el “mago”, inviand on rappòrt de sudditansa ò plagio, el rièss facilissimament a ciappà di danee, e di proprietà intregh, inscì che fann andà in bollètta el pòver descaviggiaa.
Gh’è anca di casi che i vìttim subìssen di tortur fìsegh e adrittura di dagn fìsegh causaa de di rituai prategaa di “maghi”.

Che consilli e rassicurasion dagh a quèi che attualment hinn plagiaa?
L’è diffìcil a on plagiaa fagh toeu cosciensa del fatt che el se troeuva in quèsta situasion.
El plagiaa el gh’ha bisògn d’on gròss sostègn moral de part di parent e de quèi che ghe stann arent, ma despèss el “mago” el rièss pròppi a fà sì che la persònna la se slontanna del “sciroeu” di persònn che podarìssen mèttel in guardia.
El consilli pussee presioș l’è pròppi quèll de stagh a la larga di “maghi”, e de fidass mai de di persònn che in cambi de danee affermen de restituì di amor perduu, el lavorà ò la salud.
Chi poter chì finadèss nissun l'è riessii a demostrà che esìsten, el nòster destin l'è domà in di nòster man.
Se se rièss a fà capì quàst al descavigiaa capitaa in di man di “maghi” allora fòrsi el podarà a pian rendes cunt de la situasion che el se troeuva.