Sit de coltura e attualità
al cent per cent in lengua milanesa
Invia i tuoi messaggi a:
info@elmilanes.com

i Italian e la magia
I risultaa del rappòrt Eurispes 2002 sui maner de vita di Italian

Come tutti i ann, la riva la fotografia de l’Italia presentada de l’Eurispes.

L’identikit l’è staa mettüü insèma a la figüra del Tartarin de Tarascòna, che con la fantasia el fa di gèsta ardimentos, ma poeu el se tira indree quand l’è che el riva el moment de vivi debon. On poo püssee mèj del fà de dan dan visin al nichilism del Oblomov, che el ne rappresentava l’ann passaa, ma semper lontan del fà a men di comodità de cà nòstra. A l’Italian medi ghe pias sognà, almen fin a quand a gh’è nò de mètt in pratica i sò fantasii. Natüralment, ‘sto mond che l’è in giudes tra el sògn e la realtà el passa anca per la ricerca di “solusion immediaa”. Come el “mago” che, sòtta di compens tanti vòlt astronòmich, l’illud de risòlv i problèma de la vita real. A opinion de l’Eurispes, i Italian che ricorren ai “operador de l’occult” hinn 10 milion (anca se a numm la par decisament ona cifra foeura de misura: vorarissom nò che füdèssen staa cüntaa anca quèj che disen de legg el pianètta, che ciamen i “maghi” in Tv o che hinn andaa ona vòlta a on stüdi de on “mago” o de ona induvina.

De sòlit, i vìttim di bolgir e gàbol gh’hann on’età media de 45 ann, e hinn per el 45% di dònn, per el 38% di òmen e per el 4% di fioeu. L’identikit el fa ved anca el livèll bass medi de scolarissasion de quèsti persònn: nepunemanch, i diplomaa e i laureaa riven al 14% del total. In di ültim quattr’ann, la percentual di frequentador di “maghi” e imbonidor l’è andada sù del 30%, portand a on fatturaa per ann valutaa intorna ai 5 miliard de èuro (desmila miliard de vèggia lira); de quèsti, el 97% rigorosament sensa tass.

I vendidor de sògn verificaa in Italia hinn 21.550; a quèsti occorr giontà on nümer che el se pò nò precisà de operador sommèrs (i iscritt al minga ricognossuu “albo professional europee de la magia” hinn pòcch pussee che 1.000, ona percentual irisòria rispètt ai praticant abusiv). I element, riportaa in l’ültim rappòrt Eurispes, hinn del teléfon antiplagio, a opinion de quèll, “maghi” e di sedicent “maghi” avarissen evadüü el fisco per squas 13 miliard de èuro documentàbil (25.000 miliard de vèggia lira) tra el 1990 e el 1998. El listin di prèssi a l’è car: per fà légg la man la costa 26 èuro (50.000 de la vèggia lira) ai 129 (250.000) e on pòrta fortünna el pò varè de pòcch ghèi a on bèll palpiroeu de biglietton. In salida l’è el mercaa televisiv, con desènn de trasmission dedicaa ai curios che seguissen l’occult, per on gir de affari intorna ai 500 milion de èuro (1.000 miliard de vèggia lira) l’ann. Al telespettador la vegn offèrta pussee che alter la possibilità de contattà el “mago” travers di lìnei telefònich a pagament (i famos 166, 144 et cetera, che costen intorna al 1,5 èuro, 3.000 franch de vèggia lira, al minut).

I “maghi” e i stròlegh reclamissaa in Italia hinn circa 7.250; de quèsti, 4.200 hinn in la radio, in la tv e in di giornai, e 3.050 hinn in l’internèt. E, se a gh’è on quaidun che l’ha perdüü domà del temp e on quèi franch per parlà cont ona semplis assistente centralinista, a gh’è anca on quaidun che l’ha pagaa 15.500 èuro (30 milion de vèggi lira) per ona fantomàtica posion anti-Aids. Del 1994 al dì d’incoeu a se stimen circa 7.050 segnalasion per bolgir e gàbol faa in del loeugh de l’occult. Ma domà quatter vìttim su cent fann denuncia. La metà di “maghi” l’è al nord (49% contra el 21% del center e el 30% del sud e di ìsol). Per i sètt e i grüpp esotérich, la ripartision per region la ved guidà el nòrd (57%), seguii del center (25%) e del sud e di ìsol (25%).

ARTICOI