Sit de coltura e attualità
al cent per cent in lengua milanesa
Invia i tuoi messaggi a:
info@elmilanes.com



















M
ilan el cognoss i alter coltur. I curiosità artisanal in fera

Mila e pussee oggètt divèrs de tucc i paes del mond hann cattaa l’attension di Milanes che hinn staa in fèra.
Anmò ona vòlta Milan l’è diventaa el (crocevia) del mond. L’è appèna finida la fera de l’artigianaa, con pussee de trii milion de visitador del 29 de November al 8 de Dicember.
La fera l’è stada organișșada de la Ge.Fi. Gestione Fiere, con la collaborasion di associasion sindacai artesan e la Region Lombarda.
On pont “clàssich”, i ristorant de tanti part del mond. Anca se, de spèss, per pacciaa la ghe voreva tanta pasiensa, de la fila che la gh’era.
La fera l’è stada dividuda per àrei geogràfich, e i coltur divèrs hann poduu mètt in mostra i sò laoreri e i sò tradision: la gioielleria, i mòbil, i decorasion, l’abbigliament, i materass de lana, i covèrt merinos, i folard de seta e robba de mangià.

I Sciòper selvagg: Milan bloccada trii dì

Milan, el mes de Dicember del 2003. Trii dì teribil per la gent de Milan. L’è succeduu cont el sciòper selvagg di mèșși, inauguraa el 1 de Dicember e faa anmò el 20 e el 21. El primm del mes l’era programmaa on sciòper regolar, segond i règol stabilii de la legg: on period de fermada a la mattinna, on period el dopomeșșdì. Però, i tramvier (a part ona quèi rara eccesion) hinn minga vegnuu foeura di rimèss nanca la mattinna. La città l’è andada in confusion: hann minga avvertii, i lavorador hinn staa costrètt a ciappà on tassì o la màcchina per andà a lavorà. Vanificaa el dì “ecològich” faa appèna 24 or prima, e tanti dàgn a l’economia. Oggètt de la protèsta el noeuv contratt di autofèrrotramviér, bloccaa de düü ann. El sciòper selvagg l’è staa imitaa dai lavorador de alter città (compagn de Còmm, Bèrgom, Gènova, Venesia, Ròma e Nàpoli). E l’è staa replicaa el 20 e el 21, i dì de la spesa de Natal per tanti Milanes (ma anca di dì de lavorà per tanti alter). E l’è andaa innanś anca dòpo el compromèss firmaa a Ròma el dòpomeșșì del 20 in sul contratt del lavorà. A differensa di on quèi prefètt de alter città (compagn de Còmm e Ròma), el prefètt de Milan Bruno Ferrante l’ha aspettaa el 21 per precettà i tramvier. A partì del dì dòpo.

L’Acquabomber el fà paura

La par diminuida, ma minga completament la psicòsi de l’Acquabomber, el criminal che el siringa di sostans tòssich in l’acqua mineral. Dòpo el verificass de tanti cas, però, i barista e i consümador hann ciappaa i sò contromisür: voltà sott'sora la bottiglia de acqua per vidè se gh’è on quèi büs. E üsmà l’acqua ona vòlta avèrta, per vidè se la spussa de detersiv al limon.

El Crack de la Parmalat: fermaa el Calisto Tanzi

Milan, el 27 de Dicember del 2003. Cont el fèrmo del Calisto Tansi, ex president de la Parmalat, a San Vittor el se sara sü el primm capìtol del crack de la Parmalat.
El Tansi l’è staa accüsaa de associasion a delinquer finalișșda a la bancarotta fraudolenta e fals in bilanc. Intant, l’è staa deliberaa el staa de insolvensa de la società parmeșanna.