Sit de coltura e attualità
in lengua milanesa
Invia i tuoi messaggi a:
info@elmilanes.com

































l’associazion Amis Cascina Linterno
i radis del territòri

Per el sò collegament particolar all’incroseggiadura tra dò ass viari antichìssim e per la particolar conformazion di sò territòri agrìcol, el borgh de Lintèrn el pò vèss staa presumibilment on insediament rural isolaa giamò in l’época cèltica.
I primm notizzi documentaa de la Cassina Lintèrn vann indree al 1154, quand la ven minzonada in de la pergamènna “Carta di investidur” in l’archivi de la Canònica de Sant Ambroeus.

Despòsta in su ona strada tradizional, la “Via longa” (la via Fradèi Zòia del dì d’incoeu), squas mila ann fa l’antiga “Infernum” (come la s’è ciamava la Cassina Lintèrn finna al XVI sécol) l’era on insediament rural tegnuu de ona comunità monàstica, fortificaa con di torr con la lobbiètta, e a l’occorrenza anca on rifug per viandant, verosimilment ligada ai fratres templar per la soa dipendenza accertada de l’hospitale de San Giàcom al Ristocan (via Molinazz). Segond el germanista Nerio de Carlo, la paròla “Infernum” la deriva de la lengua germànica di Longobard: dòpo la preposizion in el vegn l’avvèrbi de loeugh fern, var a dì lontan. On fond separaa, distaccaa, l’era, donca, la Cassina. In effètt la stampa longobarda de la zona l’è documentàbil coi familli de Bagg, de Marlian, de Quart e de Rhò, che dichiaraven de professà la “legg longobarda” anmò a la fin del XII sècol. L’antiga via di pellegrinagg del cénter de l’Euròpa la transitava per Noara, la sfiorava Milan a òvest e la seguttava per Quart in direzion del Ronchètt, de Mont Gaudi e de Pavia. I destinazion principai eren Ròma, i sit de la Tèrra Santa e, in sens invèrs, el Santuari de San Giàcom de Compostela in Galizia.
Ona tradizion antichìssima la liga La solitùdin del Lintèrn al Petrarca come la pussee cara abitazion di poètta e umanista, doe, in del quiètt de la campagna, el podeva lavorà serenament; on sit che el gh’ha la prerogativa de vèss l’ùnica abitazion anmò esistent a Milan di quàtter residenz del Francesco Petrarca in del sò perìod in di Viscont del 1353 al 1361.
Del 1992 tutt el complèss, de proprietà privada, l’era destinaa a vegnì on condomini de lusso, ma del 1994 tanti cittaditt hann convinciuu l’amministrazion comunal a bloccà el progètt. De chèll ann lì, on grupp de volontari hann daa vita a l’associazion Amici Cascina Linterno, per la salvaguardia e la valorizzazion de la cassina, el mantegniment de l'attività agrìcola che ghe se svòlg e la conseguent tutèlla de l'ambient e del territòri intorna, el Parch di Cav, in dove l’associazion la s’è mettuda in evidenza in de la lòtta contra a la dròga.
On episòdi important l’è el gemellagg con la scòla media “Benedetto Marcello” de Quart che l’ha adottaa la Cassina in del camp del progètt europeo de la Fondation Pégase “La scòla la adotta on monument” per dimostrà che con l'amor, la volontà e l’entusiasm la se pò fà riviv ona cassina minacciada de la degradazion.
La scòla l’ha realizzaa on plàstich de la Cassina a l’época del Petrarca e on esempi de restàor conservativ cont on ciclo pittòrich in del stil del XIV sécol. Tutti i ann la ripropònn ona Sfilada Stòrica che la se pienta de rappresentazion e spettàcol. L’Officina de la Sfilada stòrica la gestiss ona importanta sartoria de vestii de stil medieval e accessòri, e la promoeuv di cors specìfegh per tamborin, sbanderador e balleritt medievai, offrend la presenza di figurant in occasion di manifestazion in la zòna.
Squas de on ann, el slontanament obbligaa de la Cassina Lintèrn di volontari l’ha causaa di cediment struttura. Ma l’Associazion l’ha minga rinonziaa a difendel anca esternament, l’ha tiraa dent la cittadinanza cont el gazebo itinerant Linterno per sempre e l’ha aderii a di manifestazion cittadinn important (la fèsta del San Padre Pio, la sagra de Ceravall, la fèsta de Bagg).
Di radis del territòri, l’Associazion Amici Cascina Linterno la sigutta a promoeuv ona coltura noeuva che la faga stà pussee visin i generazion de la città.
In la società attual dinàmica e razionalizzada despèss se sent la mancanza del “gran coeur” de Milan. E in sti contrad, definii a spropòsit “dormitòri”, despèss la vegn foeura la sensazion che Milan l’abbia tradii la soa vocazion policéntrica che, squas mila ann fa, la gh'ha daa vita a ona città spléndida e potent in armonia con la soa campagna. Diffìcil tornà al passaa? Forsi. Ma chì iniziativ chì rappresenten on‚inversion de tendenza. L’important l'è fermass nò, e andà innanz. Senza paura.