in lengua milanesa
info@elmilanes.com
|
|
Sit de coltura e attualità in lengua milanesa |
Invia i tuoi messaggi a: info@elmilanes.com |
  |
...el
RAF de la Sonja Annibaldi Per festaggià i vint’ann de carriera, Raf l’è tornaa a la grand, cont on noeuv album dal titol “Ouch”, on progètt verament interessant ligaa a Legambiente, ona biografia e on tour ch’el partirà l’estaa che ven. Raf, quanti progètt! Prima de parlà del noeuv album, voeuri domandatt se l’è che te rend pussee orgoglios in stì vint’ann de carriera... Bhe, hinn tanti i moment che ricòrdi incoeu, con particolar emozion, collaborazion, vittòri, viagg, ma hoo con piasè scoprii, intanta che cicciaravi cont i mè fans via internet, che i hoo faa riflètt su argoment important cont i mè canzon pop. Hoo minga utilizzaa predich ò test impegnaa, ma pur senza scriv musica d’autor son riessii a trasmètt l’instèss el mè messagg. La canzon popolar l’è stada spèss on poo snobbada da la critica, ma in sto cas l’ha vinciuu la soa immediatèzza. Come mai in stì ann te preferii dedicat pussee a l’Italia, puttòst che tentà la carta del mercaa internazional? Dòpo el tòcch dance “Self Control”, ch’el m’ha lanciaa in di ann 80 in tutta Euròpa, hoo cercaa de realizzà alter canzon in ingles, da mandà a l’ester, ma gh’aveven nient a chè fà con la dance e la mia idea l’è stada scartada da la cà discografica. Ma laorà per el pubblich italian l’è staa altrettant important e mì son content inscì. Certament, ma i test di tò canzon hinn intens e t’avaria poduu sfondà a l’ester con canzon in italian... Come Eros Ramazzotti e Laura Pausini?, lor hann sfuttaa on bèll moment con di bei canzon. In del mercaa discografich Uk e USA ògni canzon minga de cà soa la ven considerada on poo exstracomunitaria! Però soo perfettament che in del Sud America gh’hinn di cantant che còpien i mè canzon, ghe cambien el titol canten in spagnoeu, ma i canzon hinn quei pensa che ciappada per el c...! Perché el tò noeuv cd s’intitola “Ouch” se voeur dì? Numm quand se scòttom disom ahio, i ingles disem ouch! Nel test de la canzon (la nòna) se capiss el perché hoo utilizzaa stà esclamazion. Vorevi trovà ona manera minga tròppa trist per parlà di dramm sociai e de chì problemi gigantesch che affliggen el nòster mond e hoo utilizzaa on titol di fumètt. Nel cd a gh’hinn divèrsi stil musical. I canzon hinn nassuu tucc in del stèss period? Tant hinn nò mè, ma di musicisti minga conossuu, fada eccezzion per Mario Venuti (l’ha partecipaa al festival de Sanremo con la canzon Crudele). Hoo preferii cattà foeura con cura del material de autor minga famos e anca toeu da lor consili prezios. El tòcch “El prestigiador” per esempi scritt da on giovin autor, m’haa colpii per i sò protagonist on poo Fellinian e numm se podom benissim riconossèss in lor. Come ben te see, mì sont affascinaa da semper da i canzon d’amor, doe se canten amor finii tragicament... Quali hinn i tò canzon? “Tutti i miei giorni” e “Milioni di cose che non ti ho detto” doe ona situazion d’amor tragica la diventa ona canzon. In del cd gh’è anca ona traccia multimedial, de còssa se tratta? L’è on progètt ligaa a Legambiente. Se cercherà de bonificà ona zòna ne l’Equador per fa sì che dal terren diventaa fertil, vegna foeura del mangià. Inolter stì futur òrti botanich sarann gestii di stèss fioeu quand diventeran grand. Mì mandaroo personalment di danee e andaroo tra quai ann a controllà che tutt vaga per el mej. L’è la prima vòlta che collabori con Legambiente, in voeuna di sti giornad simbòlich per tegnì nètt el mond m’hann propòst el progètt e mì gh’hoo accettaa cont entusiasmo. L’è dree vegnì foeura on liber ch’el conta de tì! Sì l’hoo scritt con Domenico Leggeri. L’è ona biografia minga on romanz e conti a 360° di curiosità sfizios e di raccont da la mia infanzia al Raf musicista. Tour Sì el partirà st’estaa, cantaroo in spazzi avert, anca se per adèss son minga bon de vèss pussee precis. Te dispias partì e lassà toa miee e i tò duu fioeu a cà? Per realizzà sto cd hoo passaa pussee de duu ann in cà, ora l’è el moment se sonà e son content, ma se ghe sarà l’occasion giusta e se staroo fermo on poo, come al sòlit, cercaroo de famm raggiung de lor. Bianca la gh’ha sètt ann, Samuele trii. Come te se divertisset con lor? Giogom a fà la lòtta, ma con la mama se organizzen di gioeugh on poo pussee tranquill.
|
