in lengua milanesa
info@elmilanes.com
|
|
|
Sit de coltura e attualità in lengua milanesa |
Invia i tuoi messaggi a: info@elmilanes.com |
       |
...la CHIARA l’Inedith Piaf milanese del Pierluigi Crola - intervista del 2004
Prima de tutt, ona quai paròla su de tì. Chi te seet e ‘s t’hee faa per Milan e per la coltura in general? Me ciami Chiara, “figlia d’arte”; la mamma cantant lirica , el papà ristorador, da lù hoo ereditaa la passion di locai pubblich (che poeu hoo “trasmess” al mè marì), da la mama la vos e l’amor per el canto. A 16 ann el mè primm provin in Rai, la prima incision e la partecipazion a on quai spettacol. Cominciavi a volà in de el mond de la musica quand hoo incontraa el grand e unich Amor de la mia vita! Innamoramm, sposamm, mett al mond dò tosann e, mett de part la musica per fà la mama l’è stada la mia priorità. Per Milan son stada disponibil a organizzà e partecipà a tanti spettacol de beneficenza a favor di disabil. Hoo ricevuu l’Ambrogino d’òr per merit artistich e umanitari. Dato che hoo faa tanti trasmission in radio locai, ghoo avuu possibilità per fà conoss personagg, autor, poetta cantant de la nòstra Milan. T’hee faa domà (se fa per dì) di dischi ò te see “slargada” anca in alter camp (teater, letteradura)? E se l’è giusta la prima ipotesi, perchè sta scelta? Hoo faa vun e l’alter. Hoo incis 4 dischi 33 giri (“CANZONI MILANESI DI SUCCESSO”, “INEDITH PIAF“, “CHIARA RITRATTI”, “INNO A L’AMUR”) e on para de CD (“AMICI MIEI” e “DAI NAVIGLI ALLA SENNA”) ma hoo anca lavoraa in di teater important, come: S. BABILA, NUOVO, LIRICO, NAZIONALE, AUDITORIUM S. FEDELE, TEATRO DELLA REGIONE, CRISTALLO, SMERALDO, S. CALIMERO a Milan, LE CLARISSE a Rapallo, CASINO a S. Pellegrino, e al teater del CASINO de Nizza. Tornemm ai tò produzion musicai. Vun di tò dischi pussee famos l’è Inedith Piaf. El Svampa l’ha voltà in milanes Brassens, el Di Gemma Brel, el Candiani in letteratura Prevert e tì Piaf. L’è ona coincidenza, ona mòda, ona manera per rend el milanes internazional e fall vegnì foeura dal sò guss ò per di alter motiv? Me son mai domandada perchè alter artista l’hann faa. Per mì l’ha deciduu Luciano Beretta, el grandissim autor Milanes del Clan Celentano e de tantissim alter cantant prestigios. El m’ha scritt i pussee bèi canzon frances cantaa da EDITH PIAF, dal moment che l’ha scopetrt che la mia vos l’era adatta per i vibrazion naturai di còrd vocai. E perché sto mestee l’è staa faa semper con autor frances? Domà perchè la lingua l’è pussee “visina” anca in di son? Minga domà per i son, ma perchè la lingua Milanesa la gh’ha tanti paròll che vegnen dal frances. Tì te gh’avevet anca on local “Ostera amici miei”. Cosa l’era? Pòdom considerall el “Derby” ante litteram? Chi gh’è passaa denter e perchè l’è nassuu e perchè l’è anca finii? Osteria Amici miei cosa l’era? El sit dove se incontraven i Milanes e nòn. Per mì l’era el local musical che avevi semper sognaa: ‘vegh on sit compagn voreva dì fermass. Corr minga da ona serada a l’altra organizzaa da on impresari, ma gestimm in depermì! Faria nò el paragon cont el Gran Derby. L’era l’Osteria Amici miei e basta! Personagg come Luciano Beretta e Elide Suligoi , da Walter Chiari a la Carrà, da Enzo Bearzot a la Zanicchi, da Claudio Villa ai Gufi, da la Bonaccorti a Piero Mozzarella, da Wilma de Angelis a Fedele Confalonieri. L’osteria l’è stada averta per inscì tanti ann che riessi minga a elencaa quei che hinn passaa senza desmentegamm de on quaivun! Ricordà i autor Milanes che in di ann 70-80 hann sfornaa canzon bellissim; Chi se ricorda nò de Nino Rossi, Mimmo Dimiccoli, el cantautore, cabaretista e grand amis Cino Bottelli, Walter Valdi, Luigi Carcano, Giorgio Mangano, el Maester Pinotti, Giannina Pizzamiglio, el Maester Sergio Parisini e tanti alter? Desmenteghi minga i numeros cantant, ghitarista e cabaretista che con loor hemm passaa serad indimenticabil! Perché l’è finii? Dòpo de mì nissun l’ha vorsuu tegnì in vita la Tradizion Milanesa. Adess l’è on ristorant come tanti alter. L’Osteria Amici Miei l’è nassuda e finida con LA CHIARA! I tò argoment preferii hinn quei de la Milan d’ona vòlta, hinn rivòlt soratutt al passaa ò gh’è spazzi anca per el futur? Parlà de Milan de ona vòlta l’è come sentì profumm de pan appèna faa ò respirà ona boccada de aria pura! Spazzi per el futur: umanament el spazzi per el futur el sarà semper pussee “scurtaa”, el progress el ne regala pussee comodità, ma el ne toeu via temp de dedicà al nòster piasè. Te pòdet in dò paròll definì el tò stil e che cosa le caratterizza? Disaria: romantich melodich e cont on ciccinin de grinta, a la milanesa e francesa. Te see vegnuda foeura “da pòcch” da l’adolescenza (la gh’ha pussee de trè generazion in sui spall), impunemanch te gh’hee la voeuja e la fòrza d’ona tosetta. Qual è el tò segrett? El mè segrett l’è pròppi in di 3 Generazion, vess mama, nòna e bisnòna, de ‘vegh ona bella famiglia, dà e ricev amor. Te gh’hee on quai sògn in del cassett ò te pòdet almen confidann on tò progett futur? Sògn in del cassett? Progett per el futur? Hoo giamò daa e ricevuu tanto! Speri de continoà con la mia attività, anca nel volontariaa e poeu gòd la vitta. Per conclud, on messagg ai pussee giovin sul perché dovarien conoss, amà e conservà la nòstra lingua e coltura in d’on moment de completta globalizzazion. Per minga desmentegà quell che l’è part de ognidun de nun: i Pròpri Radis! (Fotografii fornii da la Chiara)
|
