Sit de coltura e attualità
in lengua milanesa		 Invia i tuoi messaggi a:
info@elmilanes.com

























...I Gamba de Legn... - Intervista del 2005, del Giovanni Costanzo

...fann part de la stòria musical local, ma minga tròpp...
el primm complèss el gh’ha squas vint’ann, vedèmm de conossi mej.

Se pò dì, in manera scherzosa, che vialter sonii Delta (del Pò) Blues?
L’òmm de fatt el gh’ha a disposizion ona sola manera per vèss universal ossia vèss conform a la pròpria stòria e ai pròppi tradizion e consapevol de l’originalità sacral del blues, che l’è a l’origin de tutt in on certo sens el parallelismo musical l’è giust.

Quand l’è che gh’avii cominciaa a incid i vòster dischi?
L’incision del primm demo-tape GAMBA DE LEGN VOL.1 l’è del 1992, in pochissim temp i 1000 copi hinn andaa esaurii e l’inizzi podeva minga vèss pussee incoraggiant.

El dialètt l’è la component che caratterizza maggiorment la vòstra comunicazion, ma còssa gh’è sòtta?
El vernacol milanes rappresenta l’espression immediada, inscì come i idei e quèll che se vor dì salten direttament foeura dal cervèll a la bocca, senza accorgiment retòrich de sòrta; per quèll che riguarda l’ispirazion, forse l’è mej che se affidom a ona recension che la definiss el grupp come menestèll de stòri malincònich.

Dòpo el primm “demo”?
Finalment nel 1995 ven foeura GANASSA cont el qual gh’èmm raddoppiaa i vendit del precedent laora. L’è staa assee important per numm anca perchè hann collaboraa musicisti affermaa come Roy Paci, (Mau Mau, Tonino Carotone, Manu Chau) e Marco Limido (Aida Cooper, Arthur Miles, Family Style).

Per capì el “fenomeno” Gamba, però l’è necessaria l’esperienza “live”?
Ten cont che tra el ’95 e el ’98 gh’èmm colleziaa circa 200 esibizion, èmm sonaa in tantissim manifestazion in doe olter a numm gh’eren alter band alora emergent come i Almamegretta ò i Articol 31. Certament dal viv la possibilità de trasferì i pròppi emozion e la pròppi musica al pubblich l’è senz’alter pussee viva, ma anca di partecipazion televisiv e radiofanich gh’hann daa di grand soddisfazion .

Nel ’98 podom parlà d’ona svòlta per la vòstra carriera?
Sì, a part la collaborazion cont el chitarrista de Vasco, Mauro Palermo, per la prima vòlta ghìèmm utilizzaa anca l’italian per i nòster canzon.

Se dovessom cercà on manifèst d’ispirazion per i Gamba?
Pròppi con l’album del ’98, IN VINO IN VERITAS, i paròll d’ona canzon disen “...canti quèll che pensi, canti quèll che senti, canti pòcc ròbb ma hinn vera, canti i persònn sincer...”
De fatt l’è quèll che èmm semper faa.

Poeu gh’è staa on period scur...
Sì soratutt in l’attività live, per quatt’ann, ma in del 2003 èmm ricominciaa a cantà e sonà per el nòster pubblich, e sèmm rivaa quèst’ann a incid on noeuv album. El cd l’è direttament ispiraa a personagg caratteristich de Corbètta, da doe vegnom, tra i alter el pittor Boemo, el poètta Daniel Cucchiani e el scrittor Luciano Prada eredi na soa vòlta de la scapigliatura milanesa, capeggiada da Carlo Pisani Dossi, anca lù de Corbètta, ona manera de celebrà l’art e la coltura de tutta la provincia de Milan.

El grupp.
Vos: Gioann Parini (ciamaa Joepa), Tastierista e Fisarmonicista: Francèsch Bonfiglio (ciamaa Cekko), Percussion Lombard e cori: Giancarlo Cerri (ciamaa Barbèll), Batterista: Fabrizio Cassani (ciamaa Tramvai), Basso: Angelo Stoppa (ciamaa Bassman), Chitarrista: Davide Garavaglia (ciamaa Dunda), Percussion: Alessandro Maggioni (ciamaa Angelo), Armonega:
Franco Limido (ciamaa J.J.Chino).

Discografia.
Produzion e distribuzion hinn rigorosament artigianai e senza nissun suppòrt de cà discografich, editor ò distributor hann minga impedii ai Gamba de “brusà” olter 5.000 copi tra MC e CD.

GAMBA DE LEGN VOLUMM I -1992 el contègn i brani stòrich de la band da “A Milan” dedicaa ai pendolar a “Mòlta” la canzon di murador a la version rithm’n blues de Madonina.

GANASSA-1995 el segna el succèss di Gamba cont ona serie de canzon ancamò incoeu cavai de battalia “Barbera”, “Ziu Geni”, “Artemio” e tanti alter, pien de blues, son vintage e ritmi swing i canzon de Ganassa hinn tra i pussee ballaa in di concert.

In Vino Veritas-1998 l’è on cd intens e da i son fòrt e inedit in Vino in Veritas l’ha svelaa i part men conossuu di Gamba, on disch pien de rock e energii unii a ballad sal saor west-coast.
Manca minga ovviament la poesia, che in di bran come “Car al mè nan” e “Num da la bassa” regala emozion e anca qualche ricòrd, soratutt nel pubblich men gioin di Gamba.

CURIA PICTA-2004 dal nòmm antigh del borgh de Corbètta che l’ha daa i natai ai Gamba, ma anca e soratutt a grandi artisti locai ai quai hinn dedicaa i canzon pussee evocativ del cd.