Sit de coltura e attualità
in lengua milanesa		 Invia i tuoi messaggi a:
info@elmilanes.com
























...el FABIO CONCATO
de la Sonja Annibaldi

Con ben vintises ann de carriera e ona discografia de gran succèss, el cantautor Fabi Concatt l’è vun di pussee apprezzaa e stimaa artisti del panorama musical, un fior all’oggioeu.
”Voilà Concatto live” l’è el titol del sò ultimm album, (ma el primm dal viv) l’è staa registraa a Cervia in d’on piccol Teater, doe i sò indimenticabil succèss hinn staa impreziosii da di noeuv arrangiament e da collaborazion prestigios. (‘Gigi’) Lucio Dalla (‘051’) e Anna Oxa (‘In Trattoria’) e pròppi con lee l’ha deciduu de partì in stì dì per ona longa tournè.

Come l’è nassuda l’idea del ‘Concato Oxa e viceversa tour 2004’?
“El nòster el pò comparì on binòmi singolar, ma in realtà gh’èmm in comun tanti ròbb fondamentai; ona gran passion per la musica, la voeuja d’esplorà di alter percors artistich e quèlla de raccontass al pubblich in manera divertent, senza inibizion.
L’èmm faa semper, durant i nòster concèrt, adèss èmm deciduu de divid palcoscenich e emozion.
Te vedet se l’Anna l’avèss decis de fà ona tournè cont on alter artista pussee visin a lee come vos, el percors saria staa men curios. Lee sul palco l’è ona belva, menter mì quasi sussurri, ma sèmm compliz e disèmm ona battuta dree l’altra. Speri reussirèmm a ciappagh in gir in la giusta misura, sora i nòster debolèzz”.

Finalment on accopiada divèrsa dal solitt!
“Si, sperèmm de dà el bon esempi. Stì collaborazion dovarien minga vèss studiaa a tavolin ò deciduu da i cà discografigh, ma se dovaria cantà in duu domà per el piasè de fall, gh’ha obbligaa nessun dòpo 25 ann de carriera...”

I vòster musicant utilizzeran anca di strumènt etnici che vegnen da popol de tutt el mond. Sto fatt l’ha daa ona dimension particolar a la rilettura di tò canzon?
“L’è staa affascinant. Me son trovaa ben, anca se i hoo utilizzaa con criteri basten pòcch moment per evocà situazion piacevol. L’è on mond che cognossevi pòcch e de quèsta novità gh’hoo de ringrazià l’Anna che l’è ona grand appassionada.

Che tòcch vi ‘scambii’?
“Tanti in dò or e mèzza de concèrt, lee la canta con mì ‘051’, el mè succèss scritt per el telefon azzur e el brano ‘In trattoria’, mì la soa ‘Tutti i brividi del mondo’, ‘Cambierò’ e poeu se alternerèmm per rileg ‘Gracias a la vida’ de Violetta Parra ‘Tutto il sentimento’ de Chico Buarde De Hollanda e ‘Io non mi sento italiano’ on omagg al grand Giorgio Gaber”.

Ti te vivet a Milan?
“Si, se ved dal color”? (el ghigna)
Nò, l’era el spont per domandatt che rappòrt te ghee con la toa città e cont el pubblich meneghin!
“Me troeuvi ben, anca per quèll zòccor dur che cont esaltazion el vegn semper a i mè concert.
‘Sta vòlta con la presénza de l’Anna rivarà anca on’altra fètta de pubblich che probabilment se saria mai vicinaa a la mia musica ...e vicesèrsa!”

Al vòster tour ghe sarà anca l’ssociazion Intervista Onlus. Te voeuret dimm on quaicòss?
“Certament con piasè, l’è on associazion indipendent e apartitica che ghe daa on’aiutt a tucc i paes in via de svilupp con l’intent de migliorà i condizion de vita di pussee pòver, soratutt quèlla di fiolin ch’hinn maggioment espòst a la miseria e ingiustizzi.
Stà associazion l’è nassuda nel 99 la gh’ha sed a Milan. Ma la laora in Bolivia, Guatemala, Perù, El Salvador, India, Bangladesh, e Mali. L’è fondamental ricordà che con vottanta ghei al dì e cont i adozion a distanza, se pò assicurà a on fioeu in condizion d’estrema povertà, de viv serenament la pròppia infanzia, per informazion consultà el sito www.intervita.it ò contattà el numer 848/883388”.

Dopo tanti ann de tourne, te se ricordet on aneddot simpatich di to inizzi?
“L’era el 1979, avevi appena pubblicaa el primm cd ‘Zio Tom’, me spettaven in on local in provincia de Matera per ona serada. Ona vòlta sul palco e cominciaa a cantà, el pubblich che cognosseva nessuna di mè canzon, a part ‘A Dean Martin’, l’ha cominciaa a subissam de richiest chi me domandava ona canzon de Cocciante chi de Venditti, a la fin vist che mì continuavi a cantà i mè canzon m’hann invidaa a vegnì giò e a mangià con lor pan e luganega, meno mal che gh’avevi su i spall quattr’ann de cabarè, in stì cas l’è necessari sfoderà on discrett sens umoristich....”.

Te ghe sens umoristich, ma anca per la familia, te dispias minga partì in tourne?
“Nò in la manera pussee assoluda , pussee passa el temp pussee dòpo on period casalingh me ven la nostalgia del palcoscenich, mia miee le sà, quand cominci a vardà i valis, l’è rivaa el moment de lassamm andà”.

Sito Internet: www.fabioconcato.it