Sit de coltura e attualità in lengua milanesa

Invia i tuoi messaggi a: info@elmilanes.com

I  CANTAMILANO de la Sonja Annibaldi Se sèmm incontraa al termin d’ona dirètta a Telelombardia, che oramai la par diventada la soa seconda cà, grazie a la famosa emittenta lombarda e al giornalista Roberto Poletti, che i a invitaa e de spèss i a voeur al sò fianch durant i sò trasmission, i Cantamilano hinn diventaa familiar al pubblich. La “Buongiorno Lombardia” defatt da on para de stagion l’è la sigla de succèss d’on notissim programma ch’el và in onda tutti i mattinn ai 7 or. Forse minga tutti sann che l’Angelo Truffi, Paolo Menichini, Gianni Bambozzi e Giuseppe Brescia ossia i quatter component del grupp, gh’hann ai spall ona interessanta e longa esperienza de palcoscenich. Angiol come te ghe incominciaa l’attività artistica? “Come i alter component del grupp hoo faa ona gavètta, hoo cominciaa per scherz tanti ann fa, grazie a on’amis ch’el gestiva on teater. L’è staa lù ch’el m’haa propòst de mètt insema on spettacol che l’avaria dovuu riproponn l’atmosfera di vègg osterii. On’idea totalment noeuva, che l’ha ciappaa forma ai 2.30 d’ona mattina intorna a ona tavola, intanta che bevevom on quai biccerin, se sèmm trovaa in sètt. Mì hoo preparaa el repertòri insema al Giusèpp, che come mì l’aveva frequentaa per tanto temp la Milan di Navili in di ann 60-70, credevom minga in on succèss inscì strepitos, invece gh’èmm faa on sacch de replich”. In còsa consisteva el spettacol? “Vun de numm el contava su di aneddot intanta che vegniven propòst, cont ona scenografia piuttòst scarna, i canzon indimenticabil de la tradizion milanesa. Dòpo quèlla esperienza e tanti ann de musica, el grupp se ridòtt a trii element. Nel 2000 mì e Giusèpp gh’èmm incontraa Paolo e Gioann ( allora se ciamaven Mediolanum” gh’è nassuu inscì i attual Cantamilano e con lor èmm registraa el CD “Scompilescion Milanesa ”. Che gener de difficoltà s’incontren incoeu, nel riproponn musica dialettal? “Fortunatament la s’è minga perduda del tutt la voja de riscoprì i tradizion. I media hinn dree ricomincià a occupass di tradizion lombard dòpo on period duraa alcuni ann e, cont orgoli, te disi che se sentom on poo responsabil d’ona specie de “sveggiament”. La canzon Milanesa l’era on poo tròpp malincònica, numm l’èmm modernizzada. Gh’èmm anca ris’ciaa de mettes contra i tradizionalisti, ma el meccanismo l’ha fonzionaa e se s’hinn avvicinaa anca i giovin”. Gianni tì e Paolo scrivii i canzon: còssa ve proponii de minga fà rispètt a quei che v’hann preceduu tra i interpret de la canzon meneghina? “Senza vorè tirà via nagòtt ai grand D’Anzi, Nino Rossi e Di Miccoli, son d’accord cont el discors dell’Angiol. Pensom che sia rivaa el moment de sveggià la Milan di vègg canzon che l’è intrisa de temi anacronistich, fada de barbon, battònn, navili, nèbbia, Dòmm e Madonina. Numm voeurom descriv la Milan del 2000 e del futur, pussee spumeggianta e briosa”. Guardii al futur, ma sii ligaa a di ricòrd indelebil: cuntom i pussee bei?. “A la fin di ann 60, hoo formaa i Gatti Folk, insèma al compiant Renzo Schiroli, in quèll period hoo conossuu on poo tucc: Teo Teocoli, Diego Abatantuono, Enrico Beruschi anca el Beppe Grillo cont el quale gh’èmm lavoraa al Refettòri al Derby e a la Bullòna. Nel 91 hoo incontraa Paolo Menichini cont el quale hoo lavoraa 12 ann e insèma a lù sont sèmm andaa a fà part di Cantamilano. Paolo e la toa stòria? “Mì hoo cominciaa nel 85 a sonà cont on amis per i piano bar, proponevom cover de canzon italian. Sonavi al stòrich Conchètta, doe sont andaa per cas a sostituì pròppi el Giusèpp, che allora conossevi minga e che l’era restaa lì per ben 20 ann. Probabilment el vedeva minga l’ora che quaivun ghe dava el cambi. L’è staa lì che hoo cominciaa a proponn el repertòri del Jannacci, Svampa e Barberin e ad appassionamm a quèll gener de repertòri”. Ghe on’inconter particolar che te ricordet cont affètt? “Sì quèll con l’indimenticabil Walter Valdi. Ona persòna verament straordinaria dal lato uman e on’ottim maester. M’ha insegnaa a interpretà la canzon milanesa”. Contom sù on poo di vòster impègn futur, pontualment segnalaa dal vòster sito internet www.icantamilano.it “On poo de dì faa gh’èmm registraa el video de “Sciura Maria”, contegnuda nel noeuv CD ch’el se ciama anca lù “Sciura Maria”, ona canzon dedicada a tutt’i dònn che gh’hann dimostraa affètt e simpatia, soratutt durant i nòster partecipazion ai programmi del Roberto Poletti. Per st’estaa gh’èmm in progètt ona serie de spettacol sora i battei che traversen el lagh de Còmm, menter nel 2005 vegnerà foeura on noeuv CD de canzon milanes tutcc inedit scritt da mì e el Gianni”. Giusèpp ti te see conossuu come el barzelettee del grupp! A tì el compit de contà sù quèll che succed sul palcoscenich, intanta che ve isibii? “El nòster spettacol l’è nò domà ona scalètta d’on para d’or de musica, ma anca sul cabaret, doe mì conti sù on poo de barzellètt (i a interpreta in ona manera straordinaria v’el disi mì). Stà formula la pias, el pubblich se divertiss e tanti me riconossen anca per i mè dò partecipazion a la gara televisiva “La sai l’ultima?”. Hoo savuu che ve esibii minga domà in Lombardia? “Defatt sèmm staa anca a La Spezia, Pesaro e Urbino. Nonostant la differenza de dialètt, gh’èmm avuu tanto succèss”. Quali hinn i canzon pussee richièst dal pubblich? “Del vègg repertòri senz’alter el “Barbon di navili”  insèma a tucc quei tradizionai del D’Anzi, ghe piasen perché i a canten con numm”. Quale sògn gh’avii denter el cassètt? “Voeurum portà avanti al mej questa tradizion, questa l’è ona gran passion, l’è la nòstra vita”. Scusèmm on poo, ma vialter tacchii mai lit? “Beh, insòmma capita de vèggh ona quai discussion, ma poeu se troeuva semper on accòrd. Ògni tant se bettèga per la scalètta ò per i vestii chi voeur mètt on gilet d’on color chi ona camisa d’on alter… hinn bambanad, ma nassen spèss scambi d’opinion divertent, anca sul palcoscenich, intanta che gh’è el spettacol, vegnii a scoltagh inscì ve ne accorgerii!”.