Sit de coltura e attualità
 in lengua milanesa		 Invia i tuoi messaggi a:
 info@elmilanes.com		 *
El vintinoeuv de Magg 1176

Stanòtt, per ona nòtt,
l’è festa granda.
L’è on vintinoeuv de magg
de sògn e de miracol !
Tra el Lamber e l’Olòna,
sui bricch e vers la bassa,
cress el ciaror di stell,
pizzen i ciar in piazza.
Croccant, zuccher filaa, cavagn de gamber.
Fiolitt in spagoletta
per doggionà i pignat ligaa su on fil
ch’el corr per i sagraa de Lombardia.
Domà per ona nòtt
la luna la desseda i nòster mòrt,
i vecc che senza ciaccer
hann fa la nòstra stòria cont i cai.
In di foppon, dedree di muradej,
s’ceppen i legn, se ciamen...
creppen el marmor frecc...
Traversen i contrad, i fontanitt.
Riven de Lòd, Vares,
riva i lombard...
Ciamen a quej che incontren
la strada de Legnan.




POESII
E in d’ona nòtt de lus compagn de questa,
podeva nò mancà vun de Giussan,
de grinta scura e sciabola in di man.
Cres el fracass di zòccor...
gipp de fustagn e sòcch longh ‘me la famm,
manden in l’aria fina di campagn,
odor de fen, de crosta de polenta...
... profumm de gent onesta.
Stanòtt, per ona nòtt,
voeuren vedè el leon, quell ch’el rampega;
voeuren cantà in la gesa de San Magn..
Cantemm in de la nòtt coi nòster vec,
cantemm i sògn...
cantemm fin che ven ciar.
Marco Candiani

Finalment ona interpretazion minga commemorativa, retòrica ò de facciada, ma ona lettura da la part de la gent, spess semper desmentegada. Se sent in sti paròll profumm de gent s’cetta e onesta che la gh’ha minga vergògna de mostrass per quell che l’è, anca cont i sò miseri, perchè nissun gh’ha de vergognass de la soa stòria, bella ò brutta che la sia, pròppi perchè l’è la soa identità.

Pierluigi Crola