Sit de coltura e attualità
in lengua milanesa		 Invia i tuoi messaggi a:
info@elmilanes.com















Ona squadra de hockey “el Milano”
Articol del 2005 del Leo Siegel

“La stòria del Milano l’è nò domà quella de ona squadra de hockey, l’è anca on raccont ch’el ne vutta a fà capì i valor del spòrt in definitiva, de la vita indove el spòrt l’è metafora” quest el scriveva on poo de temp faa, come prefazion del mè liber Milanosiamonoi, on gran collega, Massimo Fini, che de la soa amicizia sutti a vess onoraa.
E poeu el giontava: “I valor indove el se pòggia el Milano hinn prima de tutt ideai, hinn quei de ‘l entusiasmo, de la lealtà, de l’attaccament de ona fed a ona bandera che la va simbolicament al de là del fatto sportiv”. A sti paròll chì pensavi, intanta che guardavi in Ungheria la Final Four de Continental Cup de hockey su giazz ottegnuda con gran fadiga, e cont altertant merit, dal Milano Vipers de Alvise di Canossa, on “patron” che sarà impossibil eguaglià. Sti righ chì me fann vegnì in ment vedè sul giazz ona squadra che la se batteva generosament contra di fenòmeni come la Dinamo Mosca e i slovacch del Zvolen, vincitor per appèna on gòll del Trofeo che come valor l’è a metà strada tra la Champions League e la Coppa Uefa de fòlbal. E anmò pussee ie ricordavi intanta che ie guardavi, on spettacol che se pò minga immaginà, de mila tifos rossebloeu che hann seguii la squadra del coeur in d’ona longa e dispendiosa trasferta, fina a on paesell dal nòmm impronunciabil (Szekesfehervar), fondaa dai roman, come testimònien i ruvinn archeològich a pòcch meter dal nòster Hotel Alba Regina, denominazion latina, per l’appont.
In pista el Milano, l’era prevedibil, l’ha soffert tantissim, ma come se auguraven i sò tifos l’ha spenduu tutt quell ch’e gh’aveva fina a la fin su ògni disco, on miracol sfioraa pròppi contra la Dinamo vincidora cont on scart ridòtt (5-3) dòpo che l’era stada inciodada sul pari per tanto temp. On quaidun come el collega Luigi Bolognini, su Repubblica, l’ha definida “la miglior partida de semper” del Milano. Lù l’ha minga poduu assist a la memorabil vittòria del 1991 sui finlandes del Turku, a Dusseldorf, in di semifinai de la coppa di Campioni, quell giudizzi chì l’è giustificabil, ma ch’el Milano l’abbia compii ona grand impresa se pò minga negall. Ona prestazion del gèner trasferida al fòlbal, l’avaria poduu regalà ona vittòria, ma l’hockey rarament el pò esprimm di risultaa eguai ai valor in sul giazz.
Adess parlemm del mitich pòpol rossebloeu, spettacol in del spettacol come semper quand el Milanò el s’è incrosà con la stòria. Per trii dì hann faa da incredibil colòna sonòra ai partid di Vipers, hann realizzaa coreografii spettacolar, robandogh spess la scèna ai atleta in pista.
La stampa ungheresa, incredula, l’ha scritt pagin stupend sul sò cunt. Pat Cortina, allenador del local Alba Vòlan, ex tecnich de la nazional italiana con longa militanza in di confinn padan, i aveva informaa a la vigilia: “Vedarii che ròba combinarann quella gent lì in sui tribunn”. Ona ròba l’è immaginà, on’altra l’è assist de persòna.
Avarann minga provà i sgrisor come numm, quand se levava sù el còr grandios de “O mia bella Madonina”, l’inno del Milano, ma, nonostant tutt, hann finii per partecipà anca lor a la gran festa di òspit. Esagerazion, la mia? Per nient. El Bolognini sul sò giornal l’ha scritt:”I tifos milanes hinn staa bon de conquistà tucc, cont el sò cantà ininteròtt in del cors de la gara, e con la soa passion sincera. A la fin el palazzett intregh el se uniss a tifà per i Vipers. La Milano che la vinc stavòlta l’è quella di gradinad”.
Sul Giorno, el ghe fa eco anca Alberto Ambrogi: “Dusseldorf 1991, Zurigo 2002 e adess chì: la grandiosità del tifo rossebloeu la conoss nò distanz e la se ferma nò denanz ai sconfitt. On tifo ch’el commoeuv (...) I giugador cambien, i società anca, ma i tifos de la Milano rossaebloeu hinn on patrimòni che nissuna sconfitta, nissuna delusion, la podarà scancellà”.
El s’e incorgiuu anca el Berlusca, quand in di ann novanta l’ha tentaa de cambià el Milano cont i sò Devils, ma l’è staa costrett a sbaraccaa dal grand baccan che l’ha faa el pòpol.
In pòcch paròl, i tifos del Milano hinn i pussee grand al mond. Talment grand, che a fin partida, in curva, la squadra avversaria la s’è tòlta el casco, e i ha saludaa cont el didon de la man destra alzaa, e gh’hann battuu i man e s’hinn perfina inchinaa. Cerchemm de capiss: semm nò ‘dree a parlà de daminn ma de guerrier con la pell dura, de gladiator de arenn modern, de gent abituada a dass di bastonad. I giugador vann in di spogliatòi, ma el palazz el se svoeuia nò. Inciodaa al sò pòst, i ungheres cont i sò vos e i sò battud de man se unissen a quei di milanes, on tripudi, on’emozion anca per chi n’ha vist tanti, in gir per el mond.
Torni a cà cont el cappellin e sciarpa rossaebloeu, ma hinn pù quei del Milano, ma quei di vincidor del Zvolen. M’hann di de fà el scambi, el Milano l’ha minga vinciuu, ma l’è andaa dent in di coeur. La soa stòria l’è questa.

Foto di Daniele Amadasi
(www.tuttohockey.com)