in lengua milanesa
info@elmilanes.com
|
|
|
Sit de coltura e attualità in lengua milanesa |
Invia i tuoi messaggi a: info@elmilanes.com |
|
Seguitt 02...  |
...l'ENRICO LOMBARDI del Pierluigi Crola - intervista del 2004 Per qual motiv i navili hinn nassuu e gh’hann avuu la soa fortuna soratutt in sta città? I Navili hinn nassuu per la necessità urgenta de Milan de commercià con paes lontan, almen per quei che eren i cognizion geografich del temp. Gh’emm de ricordà come la nòstra città l’era on centro de produzion de laorà important: l’industria tessil, che la confezionava tessuu diventaa famos in di mercaa pussee important d’Euròpa, in particolar quei de la Champagne, la fabbricazion di armi e di armadur, che i nòster artesan creaven per i client pussee esigent, soldaa e condottier, i prodòtt de l’agricoltura e de la zootecnia, prima fra tutti la fabbricazion del famos “cacio”, progenitor de l’attual formagg Parmigian, e quest per ricordà domà i merci pussee conossuu. Ma Milan l’è diventaa centro commercial de primm ordin perchè su de lù se accentraven anca i traffich che vegnéven de la bassa Italia e di duu pussee important loeugh de fluss econòmich marittim e mercantil, Venezia e Genova, che chì concentraven la maggior part di merci importaa da l’Orient che doveven rivà fina ai sit commerciai pussee rinomaa de l’Euròpa centro occidental. L’è duvis donca che la fortuna di Navili l’ha trovaa in Milan on ambient de fèrtil attenzion per questa che l’è stada la manera de trasportà pussee svelta, per i merci e per i òmen, per squas settcent ann, fina cioè a la comparsa de la locomotiva a vapor, al princippi del ‘800. L’ era natural, dato che se trovavom in d’ona località a l’avanguardia in de l’economia mondial, che on sistèma de traspòrt consideraa “rapid” el dessedass in di amministrador del Stat, Comun ò Signoria che l’era, ma anca in quei che in sèguit avarien gestii la città in del nòmm de sovran forestee, ona prontezza particolar in del portaa a termin di “strad” d’acqua per collegalla pussee facilment con i scimm del sò territòri, taccaa ai transit pussee facil che menaven al centro de l’ Euròpa. Inscì cont el Navili Grand se andava denter in del coeur di vii che portaven in di Alpi occidentai, in particolar i Pass del San Gottard e del Sempion, i Navili de la Martesana e de Paderno comunicaven con l’orient de la Lombardia e da chì con l’Euròpa oriental e el centro de l’Imper Asburgich; inveci, cont el Navili Paves s’è poduu finalment “dervì” la tanto desiderada via che se dirigeva a l’Adriatich, rivando ai grandi strad che andaven vers la bassa Italia, in particolar la via Emilia. L’è domà on caso che per tanti sècol e sòtta on bordell de dominazion i navili hinn staa consideraa important e soratutt utili, e inveci hann cominciaa a degradà e decad pròppi quand hinn passaa “officialment in man italian” per poeu rivà a desfass del tutt come pòdom vedè al dì d’incoeu? Mì ponaria minga in relazion diretta la decadenza del sistèma navili con la formazion del Stat italian, anca se on quaidun l’ha vorsuu vedè in di decision mettuu in òpera ai tempi del duce ona volontà specifica de scimà i al al svilupp de la navigazion interna, milanesa in particolar. De fatt, la copertura de la Sercia di Navili l’era on’operazion ormai de fà, dòpo che da sècol se ricercava ona manera per limità i problèma che ona vera e pròpria cantarana a ciel avert la creava a la gent, come epidemii de tifo a ripetizion. A conferma de sto fatto me ricòrdi che, in de la seconda metà del ‘700, Agostino Litta, trombee alliev del famos Lecchi, l’ aveva propòst on sistèma de spurgh de la Sercia, purtròpp mai applicaa perché ona proeuva al natural l’ha daa on esit minga tròpp bell. Per quell che riguarda la cessazion de la navigabilità, anca in sto caso chì i caus hinn de ricercà in la evoluzion natural de la civiltà, dal moment che se el sistèma de traspòrt per via d’acqua l’era, come hoo giamò sottolineaa, el mezz pussee rapid de traspòrt che se podeva allora doperà, certament l’ha perduu sta qualità quand l’è rivada la ferrovia e la locomotiva a vapor, sistèma tecnologicament e strutturalment pussee flessibil per collegà località anca tanto lontan fra de lor. Basta pensà a quanto podaria costà on meter de canal navigabil de front a quanto costa “mett giò” on meter de strada ferrada. Voeuri minga dì con quest che la navigazion interna la pò minga ‘vègh anmò incoeu ona soa validità, tutt alter; pensèmm a la possibilità de trasportà materiai pesant e/ò quantitativ notevol de merci su de on’imbarcazion da 1500 t, normalment doprada in di canai navigabil di nazion pussee civilizzaa de l’Euròpa, che la pò trasportà on quantitativ de merci pari a quell che trasportarien ben vintisett camion de 20 t, ma con quanto minor inquinament atmosferich el lassi pensà al lettor. Me permetti de insist. Alter dò città de l’Euròpa gh’hann ona caratteristica compagna: Amsterdam e Venezia. La prima, che l’è minga governada da italian, la valorizza i sò canai, anca per fini turistich, e la se guarda ben dal quattai, perché la sa ben che inscì perdarien la sòa bellezza, la seconda, inveci, che l’è minga governada da olandes la se troeuva in condizion del tutt different. La soa domanda la gh’ha senza dubbi pussee che on ciccinin de verità. Sta situazion la conferma in manera ciara e netta come, purtròpp, el Stat italian e i amministrazion locai gh’hann minga on gran rispett e considerazion per la difesa e el mantegniment di struttur di òper che hinn staa tramandaa a nun dai nòster progenitor, in del nòster cas i Navili, ma anca per ròbb riconossuu da tucc come unich al mond, come Venezia . Vedè incoeu la condizion de mantegniment di lett di Navili l’è ona ròba che la dovaria string el coeur a ògni milanes che, in sti canai antigh, el ved riflettes la grandezza de la soa città che, nissun le sottolinea, la gh’ha ona stòria e di tradizion che vann indree a squas dòmila e cinqucent ann fa, che l’è stada capital de grandi Stat, dal Comun, al Ducaa, che sòtta la signoria de Gian Galeazzo Visconti l’era el Stat pussee estes d’Italia, al Regn d’Italia, a la Repubblica Cisalpina. Sta disattenzion e disaffezion, e doperi domà termin “moderaa” perché se dovessi dì quell che pensi debon dovaria fà ona vera e pròpria requisitòria su la negligenza e menefreghismo di amministrazion cittadin che s’hinn daa el cambi, almen in di ultim cinquant’ann, da la fin de la seconda guerra mondial, vers sti nòster antigh testimonianz. Pròppi sòtta sti aspett Milan l’ha perduu el sò decòr antigh, la soa passada dignità che se metteven in mostra a travers on’autentica e intrinseca austerità e severità, tipica di città de rango, pregi che incoeu s’hinn trasformaa in superficialità e approssimazion, indove el frecass, la sporcizia e el disordin la fann da padroni, e le fann parè voeuna di tanti città mediterrani. Nass da sto ver e pròpri menefreghismo per tutt quell che l’è tradizion e costumm, la decadenza de tanti monument, donca anca di Navili, che, mì sostegni, se opportunament valorizzaa e reclamizzaa in di sò aspett stòrich, paesaggistich e colturai sarissen on effettiv, valid aiutt al bilanc econòmich del Comun. A conferma che ona prospettiva compagna la gh’avaria de vess considerada dègna de attenzion, naturalment avendo “dedree di spall” on progett complett e risors econòmich sostanzios, gh’è i risultaa ottegnuu, ad esempi, cont i viagg in battell che se fann in sul Brenta, da Padova a Venezia, per visità i magnifich vill venet, ò come recentement l’è staa faa dal comun de Ròma che l’ha organizzaa on servizzi regolar de navigazion in sul Tever. Fòrsi che arent ai nòster Navili se troeuven minga di vill bellissim de visità ò, anca, che la nòstra pianura la gh’abbia nò di vision e panorama dègn de vess conossuu insèma a di monument unich, come i nòster rinomaa abbazii? Son persuas che se i Navili fudessen a Amsterdam ò a Bruges, i “Venezi” del Nòrd, certament sarien nò lassaa in di condizion de vergognos abbandon che pòdom vedè incoeu.
|
